Ihobeko administrazio-kontseiluak, Arantxa Tapia sailburua presidente, 2021eko Kudeaketa Plana onartu du. 13,5 milioi euroko aurrekontua du eta bultzada nabarmena emango die ekoberrikuntza-proiektuei. Planak 15 proiektu estrategiko hartzen ditu barnean, tartean, ingurumen-plangintzakoak, enplegu berdea sustatzekoak, ekoetxeen sarearen (ingurumen-hezkuntzako zentroen) kudeaketakoak, lurzoru kutsatuak oneratzeari buruzkoak eta hondakinen kudeaketari buruzkoak (Zero Pollution). Horiez gain, barne-helburu gisa, korporazio-kudeaketa aurreratuan aitzinatzea du xede.

Ingurumen-plangintzan, ekintza nagusia laguntza ematea da, zehazki, hauek egiteko prozesuetan: Ingurumen Esparru Programa berria, Hondakinen Prebentzio eta Kudeaketa Plana, Lurzorua Babesteko Estrategia eta Erosketa eta Kontratazio Berderako Programa. Guztiek ere 2030a dute horizonte.

Bestalde, ekoberrikuntzaren alde egin du irmo apustu Ihobek; aurrekontuaren % 24 izatera igaro da. Horren erakusle dira ekonomia zirkularrean berrikuntzak egiteko enpresa eta tokiko-erakundeei bideratutako laguntzen deialdiak; Klimatek, klima-aldaketako frogantza-proiektuei buruzko programa eta foroa abian jartzea; eta Europako hainbat proiektutan parte hartzea, hala nola ICEBERG (eraikuntza- eta eraispen-materialak berreskuratzeko) zein AGREE (eraikinen birgaikuntzarako) proiektuetan.

Lurzoru kutsatuak oneratzeari dagokionez, kolaborazioa indartu nahi da beste erakunde publiko batzuekin, esaterako, Sprilurrekin eta URArekin. Bestalde, Zero Pollution proiektuarekin, hondakin arriskugabeak kudeatzeko zentroaren eraikuntzari bultzada emango zaio.

Aipamen berezia merezi du Udalsarea 2030 Sareak; 2021ean, trantsizio energetikoari, klima-aldaketari eta zirkulartasunari loturiko ekintzak indartuko ditu EAEko udalerrietan. Azkenik, korporazio-kudeaketa aurreratuan, Ihoberen jarduna Agenda 2030era eta Euskalit kudeaketa aurreratuko eredura egokitzea izango da lehentasuna.

Horrenbestez, Ihobek antolaketa-egitura ere berritu du; hiru arlo tekniko izango ditu –ekonomia zirkularra, klima-ekintza eta ingurumen-jasangarritasuna–, korporazioko idazkaritza nagusi berritu bat, eta estrategia eta berrikuntzako zuzendaritza bat eta aholkularitza juridikoko zuzendaritza bat.