Caldes de Montbui (Katalunia, Espainia), Lodz (Polonia) eta Petrilan (Errumania) Jiu haranean dagoen Valea Jiului Garapenerako Elkartearen proiektua, aukeratu dituzte Ekintza Eraldatzailearen Sariaren seigarren edizioko finalista izateko. Saria ICLEIk eta Aalborg hiriak (Danimarka) antolatzen dute, Europako Eskualdeen Batzordearekin (EEK) eta Europako Inbertsio Bankuarekin (EIB) lankidetzan.

Ekintza Eraldatzailearen VI. Saria, Eusko Jaurlaritzaren eta ICLEIren arteko lankidetzaren esparruan sortu zen, Aalborg hiriarekin batera. Abian dauden edo amaitu diren eraldaketa soziokulturalak, sozioekonomikoak edo teknologikoak sustatzen dituzten ekintza eraldatzaileak aintzatesten ditu, Europako Itun Berdearen tokiko aplikazioa sustatzen duten aldi berean.

Ekintza horiek, halaber, gobernuek eta tokiko erakundeek konpromiso globalak lortzeko funtsezko zeregina betetzen dutela azpimarratzen dute, hala nola Nazio Batuen Garapen Jasangarrirako Helburuak eta Parisko Klima Akordioa.

Wolfgang Teubner ICLEI Europako Lurralde Zuzendariak eta Ekintza Eraldatzailearen Sariaren epaimahaikideak aurtengo finalisten izaera aparta azpimarratu du: “Europa ziurgabetasun handian bizi da. Ukrainako gerra eta energiaren prezioen igoera, klimarekin erlazionatutako krisia eta oraindik indarrean den pandemia ikusita, pertsona asko etorkizun hobea irudikatzen ahalegintzen dira. Erronka horiek gorabehera, tokiko gobernuek eta gizarte zibileko erakundeek trantsizio jasangarriak eta bidezkoak eratzen jarraitzen dute, gure gizarteetan etorkizun hobea lortzeko aldaketa eraldatzailea bultzatuz. Aurtengo Ekintza Eraldatzailearen Sariko finalistak horren adibide ezin hobeak dira”.

Caldes de Montbui bere tokiko komunitate energetikoaren proiektuarengatik hautatu dute. Proiektu horrek lehentasuna ematen dio CO2 emisioak murrizteari, energia fotovoltaikoa erabiltzeari eta herritarrek eraginkortasun eta independentzia energetikoaren eredu berri baterako diseinuan parte hartzeari. Era berean, ekintzak pobrezia energetikoaren aurka egin nahi du, eta pertsona guztiek energia segurua, berriztagarria eta eskuragarria izango dutela bermatu.

Lodz bere Hiri Garapenerako Estrategiarengatik aukeratu da. Estrategia horren arabera, Poloniako hirugarren hiririk handiena “organismo bizia” da, eta bizi-kalitatea hobetzea, hiri-espazioa eraberritzea eta Europako Itun Berdearen aplikazio lokalizatua sartzea du helburu. Prozesu osoan –sorreratik lehen faseetaraino– 1.500 pertsonak baino gehiagok hartu dute parte.

Valea Jiului Garapen Elkartearen Proiektuak gizarte zibilaren koalizioa aurkezten du, meatzaritza eskualde zaharrean aldaketa sistemikoa gidatzen ari diren tokiko 21 GKErekin. Proiektuak egoiliarrentzako etorkizun jasangarria eraikitzea du helburu. Valea Jiuliu Elkarteak gauzatzen dituen ekimen ugarien helburua tokiko gizarte zibila indartzea, garapen jasangarria sustatzea, lankidetza bultzatzea eta bidezko inbertsioak sustatzea da.

Arantza Acha UNESCO Etxeko zuzendari eta Ekintza Eraldatzailearen Sariaren epaimahaikideak 2022ko finalisten lankidetza-ikuspegia txalotu du: “Aurtengo finalistek hainbat alde interesdunen parte-hartzearen bidez garapen jasangarrirako eraldaketa posible dela erakutsi dute. Plazerra izan da hainbeste proiektuk garapen jasangarria lekutzen laguntzen dutela ikustea”.

Irabazlea abenduaren 9an jakinaraziko da, Eskualdeen Europako Lantaldearen ENVE Batzordearen bileraren barruan egingo den sari-banaketa ekitaldian. Saritutako ekimenak, gainera, 10.000 euro jasoko ditu bere hiri, eskualde edo udalerrian ekintza eraldatzaile bat bultzatzeko edo abian jartzeko.