“Regions4 garapen jasangarriaren aldeko eskualde-gobernuen sarearen 20 urteko ibilbidea ospatzen dugu. 200 eskualde inguru batzen dituen aliantza, erronka global handiei (krisi klimatikoa, biodibertsitatearen galera eta jasangarritasuna) irtenbideak bilatzeko lan kolektiboa egiteko. Gure lurraldean dugun eragin politikoa, lankidetza eta ekintza benetako gobernantza global eraldatzailea gidatzeko oinarria dira, elkartasuna eta garapen jasangarria funtsezko zutabetzat hartuta», adierazi du Arantxa Tapiak, Eusko Jaurlaritzako Ekonomiaren Garapen, Jasangarritasun eta Ingurumeneko sailburu eta Regions4 sarearen presidenteak.

Eskualdeek eremu horretan duten zeregina funtsezkoa da

Eskualdeak erakusten ari dira funtsezkoak direla klimaren, biodibertsitatearen eta garapen jasangarriaren arloan ezarritako helburu globalak lortzeko: izan ere, klima-aldaketa arintzeko neurrien % 75 arte eta klima-aldaketara egokitzeko neurrien % 90 nazioz azpiko mailan inplementatuta daude. Regions4 sarea eskualdeen ahotsa da NBEren negoziazioetan, Europar Batasunaren ekimenetan eta esparru horietako eztabaida globaletan. 2002an sortu zen, Johannesburgoko Mundu Gailurrean, Garapen Jasangarriaren aldeko Eskualdeetako Gobernuen Sare gisa (nrg4SD), eta 2019an Regions4 bihurtu zen.

20 urte bete dira sortu zenetik. Goi-mailako saio honetan, eskualdeek etorkizunari begira jarraituko dute, eta lan-, gobernantza- eta estrategia-planak partekatzen, hori guztia klima-aldaketaren aurkako lehen ekintza-lerroa nazioarteko esparruan entzuten dela ziurtatzeko. “Mundua ez da duela 20 urteko mundu bera, baina esan daiteke Regions4 sareak orduan lehenetsi zituen agendak gaur egun are garrantzitsuagoak direla: klima-larrialdiaren aitorpena gero eta zabalagoa da, eta alderdi interesdunak gero eta hobeto jabetzen ari dira 2030 Agendaz; egokitzapena, halaber, aitortza, trakzioa eta interesa irabazten ari da. Regions4 saretik bultzatzen aritu garen agendak oso ondo posizionatuta daude aspalditik”, esan du Regions4ko Idazkari Nagusiak, Natalia Uribek, prentsaurrekoan.

Saioak klima-aldaketaren aurrean gaur egun dagoen egokitzapen- eta erresilientzia-egoera aztertuko du, eta eskualdeko lidergoak munduko helburuak lortzeko duen garrantzia. COP27ren egokitzapen-helburuan eta prozesuetan eragiteko aukera politikoa aztertuko du, eta hark beste funtsezko prozesu batzuekin duen konexioa ere, hala nola Biodibertsitatearen Esparru Global berria eta NBEren Goi Mailako Foro Politikoa ozeanoei buruzko 14. GJHari dagokionez eta lehorreko ekosistemei buruzko 15. GJHari dagokionez.

Ekitaldiko hizlariak izango dira, besteak beste, Regions4ko Idazkaritzako ordezkariak; Local Climate Adaptive Living Facility (LoCAL) - Nazio Batuen Kapitala Garatzeko Funtsa (UNCDF); Green Deal Going Local lantaldea - Europako Eskualdeen Batzordeko ENVE batzordea; Dibertsitate Biologikoari buruzko Hitzarmena; eta Euskadi, Errioxa, Katalunia, Rabat-Salé-Kénitra (anfitrioia), Jalisco, Senegal eta Eskoziako gobernuak. Moderatzaileak izango dira Natalia Uribe eta Ihobe-Ingurumen Euskal Agentziaren zuzendari nagusi Alexander Boto.

Hitzorduan, eskualdeen zeregina eta inplikazioa ebaluatuko dira, eta goi-mailako elkarrizketa egingo da eskualde-gobernuek nazioarteko eztabaidan duten posizionamenduari buruz, jardunbide egokiak eta erresilientziaranzko bideak aztertuz. “Eskualdeak eskatzen ari dira nazioz azpiko gobernuek erabakiak hartzeko, inplementatzeko eta jarraipena egiteko prozesuetan duten presentzia handitzea, gobernuen funtsezko alderdi interesdun gisa. Helburu fidagarri eta handiguratsuak ditugu, eta emaitza iraunkorrak garapen jasangarriaren eta klima-erresilientziaren arloan. Deia egin nahi dugu maila anitzeko gobernantza eta nazioarteko, nazioko eta tokiko lankidetza erradikala bermatzeko, UNFCCCren ‘Race to Resilience’ eta ‘Race to Zero’ kanpainetako ahalegin zabalenekin bat eginez”, adierazi du Lombardiako Ingurumen eta Klima ministroak, Raffaele Cattaneok.

Adierazpen bateratua munduari

Adierazpen bateratuaren zirriborroa ere aurkeztuko da: ‘Eskualdeko gobernuen Rabat-Salé-Kénitra Adierazpena COP27rantz’. Ekarpen-prozesu baten ondoren eta eskualdeko gobernuek sinatu ondoren, Sharm-El-Sheik (Egipto) hiriko gailurrean aurkeztuko da, 2022ko azaroaren 7tik 18ra.

COP27 konferentzian, gainera, inplikatuta dauden eta interesa duten alderdien klima-konpromisoak –arintzean nahiz egokitzapenean– inplementatzeko aurrerapenari buruzko balantzea egingo da, klima-balantze globalaren bidez. Eskualdeko gobernuak, Regions4 bidez, presente egongo dira beren ahotsa transmititzeko, eztabaidetan parte hartzeko eta beste eskualde batzuetan edo maila nazionalean erreplika daitezkeen eskualde-mailako gakoak eta arrakasta-kasuak azpimarratzeko, etorkizun erresilientea lortzeko.

Mugarrien urte bat

2022 honetan, Regions4 sarearen 20. urteurrenaz gain, Stockholmen 1972an egindako Giza Ingurumenari buruzko Nazio Batuen Konferentziaren 50. urteurrena ere ospatuko da. Konferentzia hartan, Nazio Batuen Ingurumen Programa (NBIP) sortu zen. Halaber, aurten ospatuko da 1992an Rio de Janeiron egin zen Ingurumen eta Garapenari buruzko Nazio Batuen Konferentziaren 30. urteurrena, Nazio Batuen Klima-aldaketari buruzko Esparru Konbentzioaren (UNFCCC) lehen urratsa izan zena.

Goi-mailako Regions4 saioa Afrikan egingo da, COP27 bezala, eta hori agertoki ezin hobea izango da Afrikako eskualdeek garrantzi gehiago lortu eta ahaleginak birformulatzeko moduari buruz duten ikuspegia parteka dezaten nazioarteko lankidetzari dagokionez.

Ekitaldia zuzenean jarraitu daiteke esteka honen bidez.