Informazio-jardunaldian lege-proiektuaren eduki nagusiak aurkeztu dira, eta etorkizuneko legeak udalentzat izango dituen inplikazio nagusiak azaldu zaizkie udaletako teknikariei eta aplikatzeko ardura duten beste administrazio publiko batzuetakoei. Txostenek toki-eremutik planteatutako gaiei ere erantzun diete, udalen mailan haien ezarpena hobetzen laguntzeko.

Lege-proiektuan (hemen eskuragarri) esparru juridiko berri bat ezartzen da, ingurumenaren babes-maila handia bermatzeko, egungo euskal ekonomia- eta gizarte-errealitateari egokituta. Ildo horretan, arauak azken arau-garapenak jasotzen ditu, eta administrazioak esku hartzeko teknika berriak eskaintzen ditu, administrazio-prozedura sinplifikatzeko eta bizkortzeko, ingurumenaren babes eraginkorra lortzeko helburuarekin, ekonomia-jarduerak eta jarduera horiek garatzen diren ingurunearekin bateragarri eginez.

Legeak pertsona fisiko eta juridiko publikoen eta pribatuen eskubideak eta betebeharrak zehaztuko ditu; eta azpimarratuko du herritarrek eskubidea dutela pertsonen garapenerako ingurumen egokiaz gozatzeko. Helburu hori lortzeko, ekonomia jasangarri bat sustatzen da natura-baliabideen kudeaketa efizientearen bidez, klima-aldaketaren eragina mugatzen duen gizarte hipokarbonikoa sustatuz.

Helburu horiek lortzeko, oinarri arautzaile irmoa izan behar da, segurtasun juridikoa eta ahalik eta eraginkortasun handiena izan dezaten. Xede horrekin, etorkizuneko Legearen helburua da erantzukizun publiko-pribatu partekatua bultzatzea ingurumenaren babesean. Euskal gizarteak aurre egin beharreko ingurumen-erronkei konponbideak bilatzeko, ezinbestekoa da administrazio publikoen, ekonomia-sektorearen eta herritarren arteko jarduketa bateratuak gauzatzea, bizi-kalitatea eta ongizate orokorra hobetzeko aukera gisa, ekoizpen- eta kontsumo-ereduaren aldaketa bat bultzatuz, Euskadi Europa mailan kokatuko duena.

Aukera horietako batzuk berrikuntzari, ekoefizientziari edo erosketa publiko berdeari buruzkoak dira; etengabeko hobekuntzan eta eragile sozioekonomikoekiko elkarrizketan oinarritutako jarduketak; informaziorako eskubidea; eta zerga-sistema ekologiko bat garatzea, jardueren garapenean ingurumen-jardunbide egokiak sustatu eta bultzatzeko.

Etorkizuneko Legeak ingurumenean esku hartzeko 4 erregimen aurreikusten ditu. Ingurumen-baimen integratua (IBI) eta ingurumen-baimen bakarra (IBA) Ingurumen Jasangarritasuneko Sailburuordetzaren eskumena izango dira, eta Aldez aurreko jakinarazpena behar duten jarduera eta instalazio sailkatuen lizentzia euskal udalen eskumena izango da.

Jardunaldian parte hartzea

Legearekin zerikusia duten interes kolektiboko edozein zalantza edo ekarpen jasotzeko asmoz, jardunaldira joan diren ia ehun pertsonak hainbat mekanismo prestatu dituzte. Jardunaldiaren aurretik on-line inprimaki bat prestatu zen, ekitaldia egiten zen bitartean, zuzenean zein txataren bidez parte hartu ahal izan da, eta, ondoren, jardunaldiaren gaiari buruzko ideia edo iradokizunen bat aurkeztu nahi izanez gero, udalsarea2030@ihobe.eus helbidera bidali daiteke.

Azkenik, bertaratutakoei planteatu zaie ea beharrezkotzat jotzen den Eusko Jaurlaritzako Ingurumen Iraunkortasuneko Sailburuordetzaren eta toki-administrazioen arteko lankidetzari jarraipena ematea gai honetan, eta zer lankidetza-jarduera zehatzekin egin beharko litzatekeela uste duten.

Bildutako informazio guztia landu ondoren, gai baten eta bestearen emaitzak parte-hartzaileekin partekatuko dira.

Kontsultatu jardunaldiaren bideoa eta aurkezpenak