Ihobek, Eusko Jaurlaritzaren Ingurumen Jarduketarako Sozietate Publikoak, Alemaniako, Austriako, Danimarkako, Eskoziako, Eslovakiako, Frantziako, Finlandiako, Herbehereetako, Ingalaterrako, Irlandako, Italiako, Norvegiako eta Suitzako agentziekin batera parte hartzen du ikerketa eta zientzia jardunbide politikoarekin erlazionatzen dituen “Knowledge4Policy” izenekoaren eraginkortasuna areagotzeko sortutako “Jasangarritasunerako Ikerketari eta Soluzioei buruzko Interes Taldean”.

Europako Ingurumen Agentziaren babespean, lantalde horrek honako helburu hauek ezarri ditu: proiektu bideragarriak eta ezagutzak ekartzeko jarduerak trukatzeko eta ikasteko plataforma bat eskaintzea; Europa-mailako ikerketa-estrategiak partekatzea; jasangarritasunera zuzendutako gai zientifikoak aztergai dituzten Europako Ingurumen Agentziaren diziplinarteko ikerketa-lankidetzei babesa ematea; eta sare instituzional bat ezartzea epe labur, ertain eta luzerako helburu komunak dituen lankidetza estrategikoa eta operatiboa ahalbidetzeko, Europako I+G+Bko lehentasunak adosteko asmoz eta, ahal izanez gero, jasangarritasunarekin zerikusia duten lankidetza-proiektuak sortzeko asmoz.

Lantaldeak “Jasangarritasuneranzko trantsizioen ikusmolde sistemikoak” saioan du jatorria, Ihoberen partaidetzarekin “European Research and Innovation Days 2021” ekimenaren esparruan egindakoan. Ekimen horren asmoa zen ezagutza aplikagarriak sortzearen eta enpresen, herritarren eta politikaren mundu errealean eraginkortasunez erabiltzearen arteko harremana bateragarri egitea.

Lantalde hori sostengu garrantzitsua izango da Euskadiko Zientzia, Teknologia eta Berrikuntzako Plana (ZTBP 2030) klima-egokitzapenaren, lurzoruaren babesaren eta uraren kudeaketa integralaren arloan definitzen ari den Knowledge for Policy esparruko 17 ekimen eraldatzaileak Euskadin modu eraginkor eta efizientean hedatzeko.