Gainera, Basque Ecodesign Centerren lan-ildo posibleak (BEdC) identifikatzen ditu txostenak; horiek balio lezakete, batetik, ingurumen-berrikuntza EAEko enpresa-sarearen lehiakortasun-faktore bihurtzeko eta, bestetik, ekonomia zirkularrerako trantsizioa azkartzeko, honako hauen konponbide gisa: lehengaien eskasia, arazo logistikoak eta energia-segurtasunik eza. Ukrainako gerrak eta beste inguruabar batzuek larriagotu dituzte horiek.

Txostenak epe motz, ertain eta luzeko erronkak aipatzen ditu, arauetako eta merkatu-joeretako aldaketen ondoriozkoak. Txostena urtean behin argitaratzen da, eta ekonomia zirkularraren arloan arau- eta merkatu-motor nagusiak, berriak edo sortzeko prozesuan daudenak, etorkizuneko merkatu- eta arau-erregulazioei lotutakoak, aurrez ezagutu nahi dituzten EAEko enpresa-sareko enpresa guztientzako (handiak, ertainak eta txikiak) balio handiko erreferentzia bat da eta izango da.

Dokumentuak –«Lehiakortasunerako aurrea hartzea» du izenburu–, gainera, sortzen ari diren tresna batzuk jasotzen ditu, tartean, metodologiak eta ISO arauak, eta, horiek baliatuta, txostenean identifikatzen diren erronkei aurre egin ahal izango diete enpresek.

Txostena publikoa da, eta Basque Ecodesign Centerren eta Ihoberen webguneetan kontsulta daiteke.

Basque Ecodesign Center: aliantza publiko-pribatu bat EAEko enpresa-sarearen zerbitzura

Basque Ecodesign Center ekimen egonkor bat da, 2011n sektore pribatuko enpresen eta Eusko Jaurlaritzaren arteko lankidetzaren ondorioz sortu zena. Ekonomia zirkularreko proiektu berritzaileen kontzeptuak lantzea eta gauzatzea du helburu, ezagutza sortzeko eta, ondoren, EAEko industria-sarera eramateko.

Basque Ecodesign Center EAEko 16 enpresak –liderrak dira beren sektoreko jasangarritasunaren arloan– eta SPRI eta Ihobe sozietate publikoek osatzen dute. Basque Ecodesign Centerren enpresek 190.000 enplegu baino gehiago eta 19.000 enpresa hornitzaile biltzen dituzte. Bere Batzorde Estrategikoa kide-enpresen zuzendaritzek eta Eusko Jaurlaritzak osatzen dute, eta urtean behin biltzen da EAEko ekonomia zirkularraren arloko erronkei eta lan-ildo posibleei buruzko baterako hausnarketa estrategiko bat egiteko. Ingurumen-zaintza estrategikoko txostena hausnarketa horretarako oinarria da.