UZEIk sustatutako proiektua AZTI, BC3, Ihobe, Naturklima eta Kutxa Fundazioa entitateen arteko lankidetzaren emaitza da.

Baliabide berritzaile hori Ingurumen Hezkuntzaren Nazioarteko Egunaren esparruan aurkeztu da

Klima-aldaketaren eta trantsizio ekologikoaren gaia zabala eta zeharkakoa da, eta askotariko diziplinetako terminoak hartzen ditu barne. Gero eta kontzeptu berezi gehiago sortzen dira esparru horretan, baina horietako asko oraindik ez dira jaso erreferentziazko datu-base eta hiztegi terminologikoetan.

Tresna berri horren xede nagusia da klima-aldaketaren eta trantsizio ekologikoaren inguruan lan egiten duten eragile eta erakundeek behar duten euskarazko hiztegi espezializatua bildu eta bateratzea. Horren guztiaren emaitza Klima-aldaketa eta trantsizio ekologikoa hiztegia da: gai horretako terminologia sendotzen duen baliabide bat, zeinak, halaber, euskararen erabilera sustatu eta haren transmisioa bermatzen baitu eremu horietan.

UZEIk sustatutako proiektua AZTI, BC3, Ihobe, Naturklima eta Kutxa Fundazioa entitateen arteko lankidetzari esker gauzatu da

Hiztegiak 228 fitxa terminologiko ditu, bakoitza kontzeptu jakin bati buruzkoa. Fitxa horien bidez, proposatutako euskarazko termino baliokideak aurkezten dira, bai eta gaztelaniaz, frantsesez eta ingelesez dagozkienak ere; hala, erabiltzaileak bilaketak egin ditzake hizkuntza horietatik abiatuta. Gainera, fitxa bakoitzean dagokion kontzeptuaren definizio bat jasotzen da.

Kontsulta errazagoa izan dadin, fitxa terminologikoak gaika antolatuta daude: Klima eta Klima Aldaketa; Klima Ekintza; Arintzea; Egokitzea; Bidezko Trantsizioa; eta erreferentziazko akordioak, testuak eta erakundeak.

Klima-aldaketa eta trantsizio ekologikoa hiztegia prestatzeko orduan, UZEI – Terminologia eta Lexikografia Zentroaren kalitate estandarrak bete dira, bai eta euskararen arloko agintaritza linguistikoen arau eta gomendioak ere.