Basque Circular HUBek beste deialdi bat ireki du ekonomia zirkularreko proiektuak garatu nahi dituzten enpresen lankidetza lortzeko. Proiektuak HUBeko gazteen laguntzarekin eta ekodiseinuaren, ekoberrikuntzaren eta ekonomia zirkularraren sektorean esperientzia handia duten espezialisten tutoretzapean egingo dira. 

Basque Circular HUB ekonomia zirkularreko gazte profesional espezialistak trebatzeko ekimen bat da, Ihobe Eusko Jaurlaritzako Ingurumen Jarduketarako Sozietate Publikoak eta Novia Salcedo Fundazioak sustatuta, eta UPV/EHU Euskal Herriko Unibertsitatearen, Deustuko Unibertsitatearen, Mondragón Unibertsitatearen (MU) eta Basque Ecodesign Center zentroaren lankidetzarekin. Jakintzaren HUB honek aurreko bi egitasmotan pilatutako esperientzia guztia biltzen du: Bilboko Ingeniaritza Goi Eskola Teknikoko Ekodiseinu Ikasgela programan eta Basque Ecodesign Center zentroko Ideien Laborategian.

Aurreikusitako prestakuntza-zikloetan zehar, gazteek arlo hauetako prestakuntza espezializatua jasoko dute: produktuaren ingurumen-legeria, Bizi-zikloaren azterketa (BZA), produktuaren ekoetiketatzea, marketin ekologikoa, ingurumen-zaintza lehiakorra, kontsumo zirkularra eta Ekodiseinuaren metodologia. Guztira, 100 gaztek baino gehiagok parte hartuko dute, eta Euskadi osoko enpresetan garatu ahal izango dira proiektuak.

Gazteek, prestakuntza-aldia amaituta, ordaindutako praktiken modalitatean sartuko dira enpresetan; praktiken iraupena malgua izango da, 3 hiletik (2021eko urtarrila-martxoa) 6 hilera (2021eko otsaila-uztaila) bitartean, eta Basque Circular Hubeko tutore aditu batek ikuskatuko ditu une oro. Proiektu osoaren jarraipen zehatza egingo du aditu horrek, arrakastatsua izan dadin.

Interesa duten enpresek 2020/12/23ra arteko epea dute eskaera egiteko, Basque Circular HUBen webgunearen bitartez.