Durangoko Udalak iraunkortasunarekiko konpromisoa berretsi du, ‘Udalsarea 2030' udalerri jasangarrien euskal sarearekin hitzarmena sinatu ostean. Hitzarmen horren bidez, Durangoko Udalak ‘2030 Agenda’ landuko du, herriaren garapen jasangarrirako helburuak lortzeko ildo estrategiko gisa. Plan hori, gainera, durangarren partehartzearen bidez eraikiko da.

Durangoko Udalak hitzarmen bat sinatu du ‘Udalsarea – Agenda 2030' udalerri jasangarrien euskal sarearekin, herriko hainbat eremutan energia jasangarrien erabilera sustatzeko.

‘Udalsarea’ euskal administrazio publikoen arteko koordinazio foro bat eratzeko asmoarekin sortu da, udal mailan jasangarritasuna sustatzeko eta EAEko udalerrietan Tokiko Agenda 21-en ezarpenean aurrera egin zein EAEko Ingurumen Esparru Programarekin bat etortzeko.

Ildo horretan, Durangoko Udalak konpromisoa hartu du Plana 2030ra arteko ibilbide orri gisa erabiltzeko eta ikuspegi hori udal politikan eta kudeaketan txertatzeko. Gainera, 2030 Agendaren prozesuak inplementatzen lagunduko du, Udalaren konpromiso politiko eta etengabeko hobekuntzarako konpromiso gisa.

Bestalde, sarearen liburutegi birtuala zabaltzeko eta adimen kolektiboa handitzeko kontaktuak, informazioa, ezagutza, materiala eta esperientzia praktiko proaktiboki eman eta partekatuko ditu, eta Ihobe Eusko Jaurlaritzaren Ingurumen Jarduketarako Sozietate Publikoak kudeatuko du haren banaketa.

“Garrantzitsua iruditzen zaigu energia berriztagarriak sustatzen jarraitzea, eta uste dugu lagungarria izan dakigukeela ‘Udalsarea – Agenda 2030’ sarera atxikitzea. Legealdi honetan karbono aztarna murrizteko eta ingurumena hobetzeko proiektuak lantzen ari gara, eta espero dugu ‘Udalsarea – Agenda 2030' programan sartzeak norabide horretan aurrera egiten jarraitzea ahalbidetzea”, adierazi dute Ima Garrastatxu alkateak eta Julian Rios alkateordeak.

Berdeago azoka

Hitzarmena Durangoko Landako Gunean egingo den Berdeago jasangarritasunaren euskal azokaren bezperan sinatu da. Bertan, eraginkortasun energetikoaren, ingurumen berrikuntzaren, ekonomia zirkularraren, mugikortasun iraunkorraren eta iraunkortasun irizpideen araberako birgaitzearen sektoreetako profesionalek baliabideen erabilera arduratsua sustatzeko soluzioak eta sistemak erakutsiko dituzte.

Berrogeita hamar enpresa, ikastetxe, elkarte, kluster eta ikastetxe ofizial izango dira asteburuan zehar Landako Gunean. Berdeagok 100.000 bisitari baino gehiago, 560 enpresa iraunkor, ia 200 hizlari eta 150 jolas eta hezkuntza-jarduera baino gehiago antolatu ditu bere lehen ediziotik gaur egunera arte.