Ingurumen Agentzien Europako Sareko “Ekonomia Zirkular eta Berdearen” inguruko lantaldeak, Ihoberen eta Finlandiako, Frantziako, Herbehereetako eta Suediako ingurumen-agentzien partaidetzarekin, “Ekonomia zirkularreranzko aurrerapena neurtzea: adierazle sozioekonomikoak” Europako txostena argitaratu du duela gutxi.

Euskadik, Ihobek eta Eustatek egin duten lanaren bitartez, ekonomia zirkularraren monitorizazioaren egoera analizatzen lagundu du, bere esperientzia eskaini baitu trantsizio zirkularraren neurketan aurrera egiteko.

Txostenak sorrarazi duen gogoetak elikatuko du Europar Batasunak egin beharreko “Ekonomia Zirkularra Monitorizatzeko Esparruaren” hurrengo berrikuspena. Dokumentuan jasotako proposamenek adierazten dutenez, Europako adierazleek, 2023ko maiatzean eguneratutakoek, ez dute ahalbidetzen benetako trantsizio zirkularrerantz egindako aurrerapena baloratzea.

Horregatik, Europako Ingurumen Agentziaren “adierazleak ezartzeko Bellagio adierazpenaren” printzipioei jarraikiz, ekonomia zirkularraren, enpleguaren eta, batez ere, enpresen fakturazio zirkularraren jarduerak berriz definitzearen alde egin da.

Eustatek eta Ihobek azken urteotan elkarrekin egindako lanak, berrikuntzaren urteko inkestan integratuak, interes berezia sortu zuen Ingurumen Agentzien Europako Sarean integratutako gainerako erakundeen artean, ingurumen-politikaren esparruan datuetan oinarritutako erabaki egokiak hartzea ahalbidetuko duen monitorizazio-eskema izan daitekeela ikusi zuten-eta.

Informazio horrek eta “Ekonomia Zirkularraren Adierazleak. Euskadi 2021” argitalpenean jasotako analisiak osatu dute Europako txosten horretan Euskadiko trantsizio zirkularraren adierazleei buruzko kapitulu espezifikoa garatzeko oinarria.