Vitoria-Gasteizek maiatzaren 11tik 13ra Suedian egindako ICLEIren mundu kongresuan partekatu ditu bere deskarbonizazio planak, nekazaritzako elikagaien estrategia eta mugikortasun jasangarrirako eta garraioaren elektrifikaziorako ekintzen garrantzia. Biltzarrak sareko kideak bazkide estrategikoekin elkartzeko balio izan du, eta gai globalei buruz eztabaidatzeko plataforma eskaini du.

Parte-hartzaileen artean, tokiko, eskualdeko eta nazioko ehunka gobernu, nazioarteko agentziak, sektore pribatuko ordezkariak, akademikoak eta ikertzaileak eta planeta osoko talde komunitarioak izan dira.

Ana Oregi alkateordeak, Imanol Zabaleta CEAko zuzendariak, Juan Carlos Escudero CEAko Mugikortasuneko eta Datuaren Zientziako buruak eta Beatriz Garcia-Monco Jasangarritasun, Klima eta Energia Zerbitzuko arkitektoak Gasteiz 100 hiri adimendunen eta klimaren ikuspegitik neutroak direnen xederako hautatua izatera eraman duten politikak azaldu dituzte Suediako goi-bileran.

Ana Oregi alkateordea eta Lurralde eta Klimaren aldeko Ekintzako zinegotzia izan da Gasteizen ordezkaria. Gasteiz ICLEIko batzorde exekutiboko aholkulari eta sarearen Europako Batzordeko bost ordezkarietako bat izan da.

Ana Oregik adierazi duenez, “ICLEIk pisu handia du nazioartean, eta estu egiten du lan Nazio Batuekin eta Europako beste erakunde batzuekin, tokiko gobernuen iritzia kontuan hartzen dela ziurtatzeko. Gure helburu nagusia konplizitateak eta aliantzak sendotzea da, gure proiektuak beste hiri eta herrialde batzuen eskutik garatzeko”.

Ildo horretan, alkateordeak nabarmendu duenez, “mundu mailako topaketa hau aukera ona da gure hiriak nazioartean duen posizionamendu onari eusteko. Europako Batzordeak Gasteizko kaudimenari emandako azken aintzatespenarekin, gure ahotsak eta adibideak pisu handiagoa dute nazioarteko erabaki-eremuetan. Erantzukizun horrek trantsizio energetikoko eta jasangarriko politikak diseinatzera eta kudeatzera mugiarazten gaitu”.