Ekonomia zirkularreko adituek urriaren 15ean aztertuko dute Donostian bizi-zikloaren analisirako (BZA) tresnen aplikazioa, Europako Itun Berdearen ondoren garatutako lege-esparru berriari dagokionez. Ihobe sozietate publikoak antolatu du topaketa teknikoa, Kudeaketa Aurreratuaren Europako Astearen baitan, eta Euskalitek sustatu du.

Jardunaldiari hasiera emateko, aipatutako sozietate publikoak hitzaldi bat eskainiko du Europako politikak diseinatzeko tresna gisa bizi-zikloaren analisiaren erabilerak izandako bilakaerari buruz. Ondoren, Mauro Cordellak, Europako Batzordeko Ingurumen Zuzendaritza Nagusiko ordezkariak, honi buruz hitz egingo du: “Europako ingurumen-aztarna: egungo egoera eta aurreikusitako erabilera berriak”.

Bestalde, Europako Batzordeko Joint Research Center-eko Sara Blanco Pérezek aztertu egingo du “BZAren eginkizuna eta ingurumen-aztarna, produktu jasangarrien ekodiseinuaren araudi berriaren esparruan”, bereziki, burdinari eta altzairuari dagokienez. Enpresaren ikuspegitik, Maya Ormazabalek, Telefonicako Jasangarritasun zuzendariak, Ecorating proiektua aurkeztuko du. Telefono mugikorren ingurumen-jasangarritasuna neurtzeko aukera ematen duen ebaluazio-sistema bat da, Europako merkatuan dauden gailu gehienetan ezarrita dagoena.

Ecorating proiektua telefono mugikorren ingurumen-jasangarritasuna neurtzeko aukera ematen duen ebaluazio-sistema bat da

Ondoren, produktu industrialetarako produktuaren ingurumen-adierazpenean (EPD ) oinarritutako konparazio-metodologia aurkeztuko da, altzairuaren eta zuraren sektorean aplikatzekoak diren adibideekin, Euskadiko Siderurgia-Siderex Klusterrak eta Baskegurrek aurkeztuta.

Horren atzetik, Ihobek moderatutako eztabaida-mahaia etorriko da, altzairuaren sektorea ardatz izango duena. Bertan, Olarra, Sidenor eta Tubos Reunidos eta Siderex enpresek hartuko dute parte.

Azkenik, Ihobek zehatz-mehatz azalduko ditu Climate & Circularity Calculator (3C) delakoan ezarritako hobekuntzak. Sozietate publiko honek sortutako doako tresna informatikoa da, bizi-zikloaren ikuspegia duten erakunde, produktu eta zerbitzuen ingurumen-jardunaren ebaluazio sinplifikatua egiteko erabiltzen dena.

Kudeaketa Aurreratuaren Europako Astea abagune aproposa dugu Europar Batasunean kudeaketa aurreratuari buruzko jardunbide egokiak eta esperientziak sustatu, zabaldu eta elkarren artean trukatzeko.

Agenda eta programa hurrengo estekan.