Eusko Jaurlaritzako Industria, Trantsizio Energetiko eta Jasangarritasun Sailak jardunaldi tekniko bat egingo du, uztailaren 18an, ESEPE-Ekonomia Zirkularra Suspertzeko eta Eraldatzeko Proiektu Estrategikoei buruz, energia berriztagarrietarako ekipo ondasunen sektorean oinarrituta. 

Informazio saioa Bilbon izango da, eta ekimen estrategiko horrek eskaintzen dituen finantzaketa eta eraldaketa aukerak ezagutu nahi dituzten enpresa, erakunde publiko eta sektoreko eragileei zuzenduta dago.

Jardunaldiaren helburuak dira Ekonomia Zirkularreko ESEPEaren aurrerapenak aurkeztea, berriztagarrietako ekipo ondasunetarako deialdi espezifiko berriaren berrikuntzak azaltzea, eta dauden tresna lagungarriak ezagutaraztea. 

Bilera Irantzu Allende Fernandez de Eribe Eusko Jaurlaritzako Trantsizio Energetikoko sailburuordearen hitzaldiarekin hasiko da, eta ekonomia zirkularrak Euskadiko energia estrategian duen garrantzia testuinguruan kokatuko du.

Alejandro Najerak, MITECOko Ekonomia Zirkularrerako ordezkariak, orain arte lortutako mugarri nagusiak aurkeztuko ditu, baita ESEPEak industria sektore giltzarrien eraldaketan duen inpaktua ere.

Juan Ramon Ayusok, IDAEko Energia Eolikoko Departamentuko buruak, laguntza lerro berriaren xehetasunak azalduko ditu, baldintzak, epeak, ebaluazio irizpideak eta proiektu finantzagarrien adibideak barne.

Nagore Peñalva Bengoak, berriz, Eusko Jaurlaritzako Ekonomia Zirkularreko zuzendariak ekonomia zirkularrari laguntzeko tresna autonomikoak aurkeztuko ditu, inbertsio jasangarrietarako dirulaguntzak eta kenkari fiskalak barne.

Gero, galderen txanda irekiko da, deialdien eta eskaera egiteko prozeduren inguruko zalantza teknikoak eta administratiboak argitzeko.

Zer da ESEPE bat

ESEPEak (Ekonomia Suspertzeko eta Eraldatzeko Proiektu Estrategikoak) Espainiako Gobernuak sortutako figura bat dira, inbertsioak ekoizpen sarearen modernizazioa bultzatzen duten sektore estrategikoetara bideratzeko. Lankidetza publiko-pribatuaren osagai handia duten proiektuak dira, beste sektore batzuetara tira egiteko gaitasuna dutenak.

Trantsizio Ekologikorako eta Erronka Demografikorako Ministerioak (MITECO) sustatutako Ekonomia Zirkularreko ESEPEak prozesu industrialen jasangarritasuna eta zirkulartasuna hobetzea du helburu. Bi jarduera ildotan egituratzen da:

• Zeharkako lerro bat, edozein sektoretako ekonomia zirkularreko proiektuetara zuzendua.
• Lerro sektorial bat, ehungintza, plastikoa eta energia berriztagarrietarako ekipo ondasunak bezalako funtsezko sektoreetan zentratua.

ESEPE honek ekodiseinua, materialen berrerabilera, hondakinen kudeaketaren hobekuntza eta prozesuen digitalizazioa sustatu nahi ditu, horrela, ekonomia eraginkorrago, erresilienteago eta karbono baxuago batean laguntzeko.