Ihobek, Eusko Jaurlaritzako Ekonomiaren Garapen, Jasangarritasun eta Ingurumen Sailari atxikitako ingurumen-jarduketarako sozietate publikoak, bere egutegi korporatiboa argitaratu du aurten ere. 2021 honetan, gure inguruneko ingurumena eta osasuna babesteko gure ohiturak aldatzearen garrantzian oinarritu da.

2020ko parte handi batean jasan dugun COVID-19aren pandemiak ohitura asko aldatzera behartu gaitu gure osasuna eta ingurukoena babesteko: maskara erabiltzea, eskuak garbitzea, telelana, distantzia soziala... dira portaera horietako batzuk.

Ihobek, ildo horiei jarraituz, ingurumenaren osasuna ere garrantzitsua izatea proposatzen du, herritarrek 2021ean bere ohituretako batzuk alda ditzaten.

12 ohitura hauek proposatzen dira urteko hilabeteetarako: garraioko CO2 isuriak murriztea; tokiko produktuak kontsumitzea; ontzi eta enbalaje gutxiago dituzten produktuak aukeratzea; tokiko merkataritzaren aldeko apustua; aparatu elektronikoen erabilera luzatzeko erabakia; hondakin gutxiago sortzea; gure arropa berrerabiltzea; hurbileko oporraldiak aukeratzea; erabilera bakarreko ontziak kentzea; janariak behar bezala aprobetxatzea; berogailuaren erabilera efizientea; eta opari jasangarriak erostea.

Ihobek egutegiaren mahaigainerako eta hormarako bertsioak argitaratu ditu. Erabilgarri dauden 2.000 aleetako asko doan banatuko dira datozen asteetan Ihoberen kanal sozialen bidez: Facebook, Twitter, LinkedIn eta Instagram.