Hautatutako proiektuek klima-aldaketarako egokitzapena sustatzea dute helburu, trantsizio energetikoa eta lurraldearen erresilientzia babestuta eta COVID-19ak eragindako krisiari konponbide berdea ematen lagunduta. Esleitutako 19 proiektuek 1.005.296 euroko aurrekontu-zuzkidura izango dute; alegia, aurreko deialdiko zuzkiduraren bikoitza.

Tokiko ekoberrikuntza klimatikorako laguntzak proiektu berritzaileak eta beste udalerri batzuetara erraz eraman daitezkeenak egiteko dira. Toki-erakundeek gauzatu behar dituzte proiektuok, eta lurraldea egokitzen laguntzea izan behar dute xede, hiri-eremu eta hiri-inguru erosoagoak, seguruagoak eta jasangarriagoak sortuta. Ihobek eta Eusko Jaurlaritzak elkarlanean zuzentzen duten Europako LIFE Urban Klima 2050 proiektua erreferente nagusietako bat izan da programaren oinarriak ezartzeko eta diseinatzeko orduan.

Finantzatutako proiektuak ezaugarri desberdinetako Euskadiko udalerrietatik datoz, bai 1.000 biztanletik beherako udalerri txikietatik (hala nola Alkiza, Amoroto eta Ea), bai hiri handietatik (Bilbo, Donostia eta Gasteiz).

Natura oinarri duten konponbideak

Natura oinarri duten konponbideak ezartzea da proiektuen jarduketa-ardatz nagusia, eta klima-aldaketara egokitzen laguntzen du, eremu publikoetan esku hartzeak edo azterlanak eginez, udalerri erosoagoak eta jasangarriagoak lortzeko. Adibidez, Santurtzin, Bilbon edo Amurrion, ikastetxeetako jolastokietan jarriko da arreta; Urduñan, aparkaleku publikoak naturalizatuko dira; eta Ean, Muxikan eta Usurbilen, eraikin publikoak hobetuko dira, bero-boladetara egokitzeko.

Badira egokitze-estrategien eta arintze-estrategien arteko sinergiengatik nabarmentzen diren zenbait proiektu; besteak beste, Sestaok eta Alkizak aurkeztutakoak, zerbitzu ekosistemikoak CO2 hustuleku gisa sortzeko; Zamudiokoa, hondakin organikoak aprobetxatzeko, eta Donostiakoa, emisio txikiko eremuak ezartzeko. Albistearen amaierako eranskinean biltzen dira proiektu guztien xehetasunak.

Laguntzen banaketa

Ihobek laguntzen aginduan aurreikusitako zenbatekoa bikoiztu zuenez, 17 toki erakundeek 1.005.296 euroko dirulaguntzak jasoko dituzte, 19 proiektuak egiteko. Honela banatuko dira laguntzak:

«1. lerroa: klima-aldaketaren PIMA», ia 500.000 euroko zuzkidura du, eta Ingurumeneko Konferentzia Sektorialean ingurumena sustatzeko adostutako planen funtsetakoa da (ingurumenaren arloan, hura da gobernu zentralaren eta autonomia-erkidegoen arteko lankidetzarako organoa).

«2. lerroa: tokiko ekoberrikuntzarako laguntzak»: aurrekontu-zuzkidura 250.000 eurotik 514.288,23 eurora igo da.

Informazio gehiago: https://www.ihobe.eus/laguntzak/tokiko-ekoberrikuntza-klimatikorako-laguntzak-2021eko-deialdia