Animalien elikadura-produktu berri horien ingurumen-errendimendua bizi-zikloaren ikuspegitik neurtu da. Horien bidez, mahastizaintzako eta ardogintzako sektorearen ingurumen-aztarna murriztu nahi da, eta, aldi berean, sektorearen lehiakortasuna hobetu, ardogintzarekin loturik dagoen jarduera ekonomiko berri bat sortuz. Era berean, SOSTFEED proiektuari esker, untxi-hazkuntzaren sektorearen lehiakortasuna handitu ahal izango da, elikagai-azpiproduktuetatik datorren lehengai jasangarri berri bat eskura izango duelako.

Eusko Jaurlaritzaren Ingurumen Jarduketarako Sozietate Publikoaren (IHOBE) laguntza izan du ekimenak, “Ekodiseinuko, ekonomia zirkularreko eta ekoberrikuntzako proiektuak egiteko laguntzak” deritzon programaren esparruan. Programa horrek Eskualde Garapeneko Europako Funtsaren (EGEF) euskarria du. Diru-laguntzen programa honetako proiektuek berotegi-efektuko gasen emisioak arintzen laguntzen dute, ekonomia zirkularraren bidez; lehengaien kontsumoa murrizten eta isuriak saihesten, enpresa-jarduera iraunkorrak sortzen, eta enpresen arteko lankidetzak sendotzen.

BAIGORRI Upeltegia Arabako Errioxako ardo-ekoizle nagusietako bat da; AZTI animalien elikadurarako elikagai-azpiproduktuen balorizazioan espezializaturik dagoen zentroa da; eta MIBA Nekazaritza Kooperatiba Euskadin pentsuen ekoizpenean lider den enpresa bat da.