Udalsarea 2030en Kontratazio Publiko Berdeko Taldean parte hartzen duten hamabost erakundeek arlo horretan aurrera egiteko aukera emango dien ibilbide orria definitu dute. Ebaluaziorako eta jarraipenerako 11. Programaren testuinguruan burutu den hirugarren lan saioaren helburua tokiko erakundeek erosketa eta kontratazio berdea sustatzeko dituzten zailtasun nagusiak identifikatzea eta horiei aurre egiteko baliabide eta tresnak partekatzea izan da.

Erosketa eta kontratazio berdea modu mailakatuan gauzatu beharreko prozesu gisa ulertu behar bada ere, garrantzitsua da tokiko erakundeek konpromisoak hartu eta bideari ekitea. Hori dela eta, lan taldearen emaitza gisa, erakunde bakoitzak definitu duen eta bere ibilbidea gauzatzeko baliagarria izan daitekeen laguntza dokumentua aurkeztu da azken saio horretan.

Dokumentu horretan, Erosketa eta Kontratazio berdea sustatzeko ibilbide orrian proposatzen diren 6 pausoak garatzeko ekimenen inguruan, bakoitzaren azalpen laburra eta berau gauzatzeko baliabideen zerrenda jasotzen dira.

Zerrenda horretan hainbat motatako baliabideak azaltzen dira: beste erakunde batzuek burutu dituzten tresnak eta ekimenak, eta jardunbide egokiak, besteak beste.

Laburpen gisa, 5 dira erakundeen eskura dauden baliabide nagusiak:

• Ihobeko webgunean eskuragarri dauden hainbat produktu- eta zerbitzu-kategorien erosketetan eta kontratazioetan aplika daitezkeen Ingurumen irizpideak.
  
• Eusko Jaurlaritzak 2023an argitaratu duen Ingurumen klausulak txertatzeari buruzko jarraibidea.
  
• Ohiko akatsak kontratazio publikoan ingurumen-irizpideak txertatzean.
  
• “Ingurumen ziurtapenak Erosketa eta Kontratazio publikoan erabiltzeko gida” argitalpena.
  
• Pleguetan ingurumen irizpideak txertatzeko aholkularitza zerbitzua.
  

Laguntza dokumentu horrek dokumentu bizia izatea du helburu. Udalerriak pausoak ematen doazen heinean eguneratuko da, eta, horregatik, lan taldean parte hartu duten udalerriei berau osatzeko proposamenak identifikatzeko gonbitea luzatu zaie. Ekarpenak jasota, dokumentua Udalsarea 2030eko webgunean egongo da edozein udalerri eta erakunderen eskura.

Bestalde, udalerriak gehien kezkatzen dituzten gaietan zentratuz, ingurumen irizpideak kontratazio prozesuen zein unetan eta prozeduraren zein puntutan txertatu daitezkeen ere landu da, egiten diren akats nagusietan arreta jarriz eta ingurumen irizpideen txertaketa egokiaren inguruko adibideak azalduz.