Regions4Climate Finlandiako VTT Ikerketa Teknikoko Zentroak koordinatuta dago, Europako 13 herrialdetako 44 bazkide biltzen ditu eta Europako Batzordearen 24,5 milioi euroko dirulaguntza jaso du. Bertan, Ipar Euskal Herriak 3,5 milioi euro baino gehiago jasoko ditu euskal itsasertzeko uholde eta higadura arriskuei aurre egiteko. Zehazki, Ipar Euskal Herriko eragin-eremuan Euskal Herriko Aglomerazio Mankomunitateak (CAPB), GIS Euskal Itsasertzak, AZTIk, UPPAk eta Rivages Pro Tech-ek hartzen dute parte. Proiektua 2023ko urtarrilean hasiko da eta bost urteko iraupena izango du.

Euskadik Europako dozena bat eskualderekin egingo du lan erresilientzia klimatikoko konponbide berritzaileak garatzen, Horizon Regions4Climate proiektuaren esparruan

Mugaz gaindiko proiektu bat da, eta hori funtsezkoa da, euskal itsasertza osatzen duten Frantziako eta Espainiako kostaldeek erronka komunak baitituzte. Hori dela eta, Euskal Autonomia Erkidegoan egiten diren antzeko ekintzak burutuko dira. Kasu honetan, Euskal Erkidegoaren ordezkari Ekonomiaren Garapen, Jasangarritasun eta Ingurumeneko Saila eta Ihobe , Eusko Jaurlaritzaren Ingurumen Jarduketarako Sozietate Publikoa, izango dira. AZTI, Tecnalia Research and Innovation eta Zabala Innovation Consulting zentro teknologikoek ere, duten esperientzia zabaletik, Europako beste eskualde batzuei lagunduko diete, klima-arriskuen konplexutasuna hobeto ulertzeko eta ereduzko beste eskualde batzuetatik ikasitakoa aplikatzeko.

Ipar Euskal Herriko kostaldean egingo diren ekintzen artean, uholde-arriskuaren jarraipena denbora errealean egiteko tresnak garatuko dira: alde batetik, kostaldean bideometria-sistemak instalatuko dira, eta bestetik, zenbakizko ereduak garatuko dira olatuek bi kokalekutako egiturak gaindituko duten iragartzeko: bata, hirikoa, Donibane Lohizuneko badia, eta bestea, naturala, Erromardie hondartza. Horrez gain, babes aktiboa ere egongo da, kai-muturrak eraikiz eta hesi naturalak indartuz, olatuen energia desagerrarazteko.