Gidak bi ikasturtekoa den 2030 Eskola Agenda berria udal-dimentsiotik garatzen laguntzeko tresnak eman nahi ditu. Dokumentuak, parte hartzen duten eragile guztiek lengoaia, helburuak, egutegia eta lan-metodologia partekatzeko eskema eskaintzen du.

Gaur egungo 2030 Eskola Agendak herritar ahaldunduak eta kontzientzia ekosoziala dutenak osatu nahi ditu, eta bertan ikasleek ere modu aktiboan parte hartuko dute udalerri jasangarriagoak lortzeko bidean. 2030 Agendaren helburuetako bat tokiko eta eskolako agenden arteko lankidetza eta sinergiak sortzea da. Hezkuntzak eskolako harresiak gainditzen ditu, inguruko hiri-errealitatera heltzeko, eta agenda biek norabide horretan arraun egin behar dute. 2030eko Eskola Agendaren programaren helburua jasangarritasunaren kultura hezkuntza-komunitateetan txertatzea da, bereziki ikasleengan, arazo ekologiko eta sozialen soluzioetan esku hartzeko beharrezkoak diren gaitasunak eta konpromisoak garatuz, toki mailan eta maila globalean, ikastetxean eta udalerrian, orain eta etorkizunean, ekintza eraldatzaileak, indibidualak zein kolektiboak, egiteko.

Gidan 2030eko Eskola Agendaren helburuak, parte hartzen duten eragileek (ikastetxea, Ingurugela, udalak eta eskualdeko erakundeak) duten zeregina, haien arteko harremana eta horien funtzioak zehazten dira. Era berean, bi ikasturtetako ikuspegia duen eta ikasturte bakoitzeko mugarri nagusiak eta ikasturtean zehar kontuan hartu beharreko alderdiak jasotzen dituen planteamendu orokorra barne hartzen du.

Gidak, azken zatian, hainbat ikastetxetako eskolako esku-hartzeen kasu zehatzak aurkezten ditu, Urnietan, Azkoitian, Tolosaldean, Santurtzin, Barakaldon, Plentzian, Arabako Errioxan, Amurrion eta Gasteizen egindako ekimenekin.

Bizkaia Plaza eraikineko areto nagusian egin zen jardunaldian, berrogeita hamar bat pertsonak hartu zuten parte, udaletako ordezkariek, eskualdeko erakundeek eta tokiko erakundeei programak garatzeko zerbitzua ematen dieten laguntza teknikoek, hain zuzen ere.